4 Oktyabr – Dünya Heyvanlarının Müdafiə Günü

Heyvanları sevən hər bir kəs onların bizim həyatımızda necə mühüm rol oynadığının fərqinə varırlar.

Hər il olduğu kimi, 2010-cu ildə də Dünya Heyvanlarının Müdafiə Gününün özəl rolu var. Bütün heyvansevərlər bizim heyvan dostlarımızın qayğısına qalmağa və qayğıya çağırılır. Dünyanın dörd bir yanında müxtəlif tədbirlər keçirilir.

Dünya Heyvanlarının Müdafiə Günü yeni hadisə deyil, bu ənənə 1931-ci ildə Florensiyada ekoloqların nəsli kəsilməkdə olan bəzi növlərin müzakirəsi aparılan yığıncağından sonra təqvimə daxil edilib. Bundan sonra həmin hadisə əhatə dairəsini genişləndirərək, dünyadakı heyvanların bütün növlərinə şamil olunmuşdu. Oktyabrın 4-ü heyvanların müqəddəs qoruyucusu olan Assasiyalı Françeskonun vəfat etdiyi günə görə təyin olunmuşdur. Bu gün milliyətindən, inancından, dinindən, siyasi baxışından və ya ideologiyasından asılı olmayaraq heyvansevər hər bir kəs tərəfindən qeyd olunur.

Dünya Heyvanlarının Müdafiə Günü bütün heyvansevərlərə birlikdə toplaşmaq və ən əsas da xeyirli işlər görmək üçün gözəl imkan yaradır. Planetimizdəki heyvanları xilas etmək və qorumaq onların həyatında həssas bir amildir. Heyvanlarsız dünya necə də maraqsız, cansıxıcı olar, bir özünüz təsəvvür edin. Bizlər onları necə qorumağı və əhilləşdirməyi öyrənməli, bu dünyanın onların rahat yaşaya biləcək məkan olmasını təmin etmək fikrini özümüzə aşılamalıyıq.

Hər birimizə məlumdur ki, heyvanlar həyatımızda tərəfdaş, köməkçi, narahat olduğumuz anlarda yanımızda olan və bizlərə xoş hisslər bəxş edən canlılardır. Dünya Heyvanlarının Müdafiə Günü qlobal olaraq 4 Oktyabrda qeyd olunur. Bu gün heyvansevərlər bir araya gəlirlər və dördayaqlı dostlarımızın onlara verdikləri xoşbəxtlik hissini bir-biriləri ilə paylaşırlar. Dünya Heyvanlarının Müdafiə Günü köməyə ehtiyacı olan bütün heyvanları xatırladan zamandır. Heyvanlara pul verərək onları almaq və evcilləşdirmək hələ hər şey demək deyil, onlara qayğı göstərmək, sevmək lazımdır.

Bu günlə əlaqədar bütün əsas tədbirlər 2003-cü ilin Oktyabrın 4-dən başlayaraq Birləşmiş Krallıqda keçirildi. Təşkilatçılar, qruplar, heyvan yetişdirənlər, inanc yerləri, məktəblər, klublar və digər ayrı şəxslər bu günün qeyd olunmasında xüsusi işlər görməyə başladılar.

Mən əminəm ki, bizim də ölkəmizdə bu tip tədbirləri keçirtmək olar. Bu il olmasa da, 2011-ci ildən sonra bu səpkidə olan günlərin təşkilatçılığına diqqət yetiriləcək, şəxsən özüm buna nəzarət etməyə çalışacağam.

Unutmayaq ki, hər 3 saatda yer üzündən bərpa olunmayacaq şəkildə 3 növ heyvan tələf olur. Gündə 70 növ flora və fauna növü də eyni aqibətlə üzləşir. Son 25 ildə isə bioloji müxtəliflik 3 dəfədən çox azalıb. Bunlar insanlığın problemləridir, bir gün gözümüzü açıb da dünyada bir-birini qıran insanlardan başqa heç nə görməyəcəyik. Gəlin, heç olmasa bir gün özümüzdən kənar canlıları da düşünək. Heyvanlar bizim həyatımızda ona görə deyillər ki, biz onların canlarından, ətlərindən istifadə edək. Hər kəsi vegeterian olmağa çağırıram, inanın ki, insan mənəvi olaraq çox rahat olur.